Ceuta (I)

Recentemente dous xuristas e investigadores ourensáns, os irmáns Castro, Félix e Cástor, veñen de descubrir o destino final de Romasanta, rastrexando xornais na Biblioteca Nacional, e despois de anos de seguimento. A súa investigación, que toma como punto do partida o estudo exhaustivo da bibliografía coetánea ao procesamento –xornais, revistas, follas de cordel-,  foi publicada no 2012 no libro de José Domínguez, Romasanta: historia y leyenda, baixo o epígrafe de “El final de Romasanta (1854-1863)”.

Na hemeroteca da Biblioteca Nacional de España atoparon máis de cincocentas notas de prensa, tanto en xornais de Madrid (La Época, La España, El Clamor Público, La Esperanza, El Heraldo de la Mañana, El Católico, El Genio de la Libertad), como de Galicia (El Coruñés), ou en folletíns ou revistas (La Ilustración, La Ilustración Artística, El Mundo Pintoresco, El Periódico para Todos).

En xornais franceses e ingleses tamén aparecen referencias, incluso nalgún caso magnificando os seus crimes, imputándolle ter comido a dous ou tres dos seus propios irmáns (The morning Chronicle, 21-7-1852, Londres).