Pecados

 "A cidade estaba tranquila e parecía satisfeita cos seus pecados. Tomei unha cervexa e cheguei ao Rock Club co ánimo anovado. Porter inxería cubatas con esa avidez tan característica dos xornalistas con problemas de autoestima."

Diego Ameixeira, O cidadán do mes. Ed. Xerais, 2006, páx. 95.

Gárdame o segredo

 "-Déchesme unha copia das chaves a última noite que nos vimos no Rock Club. ¿Non te lembras?

Pois era verdade.

-Non me lembro, xa sabes que esa noite bebín demasiado. ¿Decatouse o teu amigo?

-Es un fillo de puta, Horacio.

-Estou de acordo, mais non o publiques. Gárdame o segredo."

Diego Ameixeira, O cidadán do mes. Ed. Xerais, 2006, páx. 84.

Preto das termas

 "-Pasado mañá tocan os Death Folkies no Rock Club, ¿anímaste?

-Pode ser. Pero se vén a Charo dille da miña parte que non se pase co perico, que logo non hai quen a ature.

-Un respecto.

-¿Estiveches no enterro do garda militar?

-Non, eu tamén tiven un imprevisto. Outro morto na chavasqueira, un fulano que durmía preto das termas."

Diego Ameixeira, O cidadán do mes. Ed. Xerais, 2006, páx. 67.

Sereas

 "Segundo me confesara baixo coacción unha das súas amantes máis indiscretas, nunca lle facía falta combater o mal alento matutino con mentolados de farmacia. A pesar de sufrir hernia de hiato e un formidable refluxo gastroesofáxico, cada vez que bicaba as sereas do Rock Club exhalaba gardenias e Happy Dent frescor instantáneo por xeración espontánea."

Diego Ameixeira, O cidadán do mes. Ed. Xerais, 2006, páx. 45. 

Vinchocas na planta dos pés

"-Foron uns nenos que andaban xogando por aquí. Pero pensei que as cousas erean deles. Como apañaron unha camiseta e uns pantalóns que tiña dentro da mochila...

-A miña camiseta do Rock Club e os meus pantalóns, quererá dicir.

A muller non respondeu e regresou ao bocadillo. Os chachos desapareceran, así que volvín á casa en bañador e descalzo. Impúxenme a penitencia de dar un longo paseo e o alcatrán adoecido da estrada dos Peares levantoume vinchocas na planta dos pés."

Diego Ameixeira, O cidadán do mes. Ed. Xerais, 2006, páx. 20.

A primeira calada

"A primeira calada, xa co cerebro máis clarexado, retrotraeume á madrugada pasada e pensei que a miña espesura mental podía recuar sen esforzos, mais non foi así. Só lembraba ter visto a Marina no RockClub, invitala a varias copas e falar polos cóbados de cuestións intrascendentes."

Diego Ameixeiras, Baixo mínimos, ed. Xerais, xuño, 2004, páx. 12