Na moto

"Saen correndo na moto, enfilan a carretera da Ponte Nova e torcen á dereita pra coller por Oira, segunda, cambio, xa en directa, qué gusto iste airiño fresco que dá na cara. A xente regresa da piscina pública, en coche, a pé, nos autobuses urbanos, a pé,  hala, bestia, hala, corre que...

           e non se oien as últimas palabras que deberon ser...

           que xa pararás. O aire infla a camisa, a camisa sóltase do pantalón e queda flotando ó vento. -Oie. -Qué? -Si non houbera xente íbamos á piscina. -¿Cómo? -Que ibamos á piscina. -Non, home, a estas horas está chea de xente.

  Tiran adiante, deixan atrás o desvío que leva á piscina e siguen despaciño porque empezan a mirar qué sitio será millor."

Carlos Casares, Cambio en tres, ed. Galaxia, colección "Illa Nova", Vigo, 1969, 1ª edición, páxs. 73-74

Un partido de singles

"A esa hora non había ninguén alí, estábamos nós os dous soilos, xogando un partido de singles e no Club non quedaba xa ninguén. O encargado foise ás sete e media e díunos as chaves, non se preocupen, logo poden deixalas no bar da esquiña que xa as recollo eu mañá pola mañá, non se preoucpen.

  Víu sair ó encargado i escondeuse detrás dun camión vello que está abandoado dende hai tempo á beira do muro principal do Club. Meteuse debaixo i agardóu que se fose. (...) casi sin esforzos, pegando un salto pequeniño, encaramóuse no arbre dos espías, a ver, a ver, aclara eso Cachorro, sí señor, é que polo vrau moitas veces subíamos a espiar as rapazas que se bañaban na piscina."

Carlos Casares, Cambio en tres, ed. Galaxia, colección "Illa Nova", Vigo, 1969, 1ª edición, páx. 48