O Felo II

Namentres que na cima

A garda e observa

A xente do castelo

Uuuuuuuuuuuuuuuuuuuuuu! berran os argalleiros dos fulanos

Axitando as súas mitras de lata

O seu rabo de serdas de cabalo

Para contrariar o mundo

Facer tremer os pillos

Burlándose dos valentes

E dos relambidos relixiosos

Quen se esconde detrás das carantoñas de bido?

Que estrañas personaxes oulean

Chían, brúan braman

E chaman a berros coma os condenados

Coa súa barba e co seu bigote

Co seu colar de pelica de coello

E co seu rabo de raposo?

Algúns din que serían

Os descendentes fanfurriñeiros

Dos recadadores de impostos

Eses estraños espantallos

Mandados polo conde

Para asustaren ós inocentes

Habelenciosos en aproveitarse do seu estupor

Para mellor roubalos

Co seu fraco monicreque

“O FELO” de Alain Jégou (poète français, 7-10-1948 Larmor-Plage; 6-5-2013)

Tradución de Emilio Araúxo.

Ed. Amastra-N-gallar. Santiago de Compostela, 2007. páx 7-8. Edición non venal.